EU អនុម័តទណ្ឌកម្មថ្មីប្រឆាំងរុស្ស៊ីជុំវិញសង្គ្រាមអ៊ុយក្រែន!
ប្រទេសបារាំង ដែលកាន់តំណែងជាប្រធានសហភាពអឺរ៉ុបកាលពីល្ងាចថ្ងៃច័ន្ទបានប្រកាស អនុម័តការដាក់ទណ្ឌកម្មថ្មីប្រឆាំងនឹងរុស្ស៊ីជុំវិញសង្គ្រាមរបស់ខ្លួនលើអ៊ុយក្រែន។
ប្រធានាធិបតីបារាំងបាននិយាយនៅក្នុងសេចក្តីថ្លែងការណ៍មួយថា "សហភាពអឺរ៉ុប នៅក្នុងការពិគ្រោះយោបល់ជាមួយដៃគូអន្តរជាតិរបស់យើង បានអនុម័តកញ្ចប់ទណ្ឌកម្មទី 4 ដែលផ្តោតលើបុគ្គល និងអង្គភាពដែលពាក់ព័ន្ធក្នុងការឈ្លានពានប្រឆាំងនឹងអ៊ុយក្រែន ក៏ដូចជាវិស័យមួយចំនួននៃសេដ្ឋកិច្ចរុស្ស៊ី" ។
ការប្រកាសនេះ បានធ្វើឡើងបន្ទាប់ពីមេដឹកនាំសហភាពអឺរ៉ុបបាននិយាយនៅក្នុងកិច្ចប្រជុំកំពូលនៅទីក្រុង Versailles កាលពីសប្តាហ៍មុន ថាប្លុកនេះកំពុងរៀបចំជុំថ្មីនៃទណ្ឌកម្មដ៏តឹងរ៉ឹង ប្រឆាំងនឹងរុស្ស៊ីជុំវិញសង្គ្រាមរបស់ខ្លួនលើអ៊ុយក្រែន។
គួររំលឹកថា ប្រធានគណៈកម្មការអឺរ៉ុប Ursula von der Leyen បាននិយាយកាលពីថ្ងៃសុក្រថា ប្លុកនេះនឹងធ្វើការដើម្បី "ព្យួរសិទ្ធិសមាជិកភាពរបស់រុស្ស៊ីនៅក្នុងស្ថាប័នហិរញ្ញវត្ថុពហុភាគីឈានមុខគេ" រួមទាំងមូលនិធិរូបិយវត្ថុអន្តរជាតិ (IMF) និងធនាគារពិភពលោក។
បម្រាមនេះ នឹងគ្របដណ្តប់លើរាល់ការវិនិយោគ ការផ្ទេរបច្ចេកវិទ្យា សេវាកម្មហិរញ្ញវត្ថុ និងផ្សេងៗទៀតសម្រាប់ការរុករក និងផលិតថាមពលផងដែរ៕
No comments:
Post a Comment